នាយឧត្តមសេនីយ៍ សឹង សំណាង និងភរិយា ព្រមទាំងកងទ័ពជើងអាកាស អញ្ជើញកាន់បិណ្ឌទី១ នៅវត្តទួលខ្សាច់
(កំពង់ឆ្នាំង)៖ នាយឧត្តមសេនីយ៍ សឹង សំណាង អគ្គមេបញ្ជាការរង និងជាមេបញ្ជាការបញ្ជាការដ្ឋានកងទ័ពជើងអាកាស និងលោកស្រី អ៊ូ សិទ្ធិរី ព្រមទាំងបុត្រាបុត្រី នៅព្រឹកថ្ងៃទី២៧ ខែកញ្ញា ឆ្នាំ២០២៦នេះ បានអញ្ជើញចូលរួមពិធីកាន់បិណ្ឌទី១ នៅវត្តវាលុកថល្លារាម ហៅវត្តទួលខ្សាច់ ក្នុងខេត្តកំពង់ឆ្នាំង។
ក្នុងពិធីបុណ្យកាន់បិណ្ឌទី១នេះ មានការអញ្ជើញចូលរួមយ៉ាងច្រើនកុះករពីសំណាក់នាយទាហាន ពលទាហាននៃបញ្ជាការដ្ឋានកងទ័ពជើងអាកាស ពុទ្ធបរិស័ទចំណុះជើងវត្តមកពីគ្រប់ទិសទីបានអញ្ជើញមកកាន់ពីវត្តអារាមយ៉ាងច្រើនកុះករ។
នាយឧត្តមសេនីយ៍ សឹង សំណាង និងលោកស្រី បានអញ្ជើញបំពេញកិច្ចតាមប្រពៃណីព្រះពុទ្ធសាសនា និងបានអញ្ជើញវេរប្រគេនទេយ្យវត្ថុ ទេយ្យទាន បូជាបច្ច័យដល់ព្រះសង្ឃ ដើម្បីឧទ្ទិសផល្លាអានិសង្ឃជូនទៅដល់ដួងវិញ្ញាណក្ខន្ធវិរកងទ័ព បុព្វការីជន មាន : មាតាបិតា ជីដូនជីតា ញាតិការទាំង៧សន្តាន ដែលបានចែកឋានទៅកាន់លោកខាងមុខ សូមឱ្យមកទទួលយកមគ្គផលក្នុងពិធីបុណ្យកាន់បិណ្ឌនេះ ។
ក្នុងឱកាសនោះ នាយឧត្តមសេនីយ៍ សឹង សំណាងនិងលោកស្រី អ៊ូ សិទ្ធិរី ព្រមទាំងនាយទាហាន និងពលទាហាន បញ្ជាការដ្ឋានកងទ័ពជើងអាកាសបានចូលរួមឧបត្ថម្ភបច្ច័យមួយចំនួន ដើម្បីកសាងហេដ្ឋារចនាសម្ព័ន្ធនានាស្ថិតនៅក្នុងវត្តវាលុកថុល្លារាម និងប្រគេនបច្ច័យកាន់បិណ្ឌទី១ ចំនួន ៨ ០០០ ០០០រៀល ព្រមទាំងមានសម្ភារះគ្រឿងឧបភោគ បរិភោគ និងទេយ្យទានមួយចំនួនធំទៀតជាថវិកាផ្ទាល់របស់លោកស្រី អ៊ូ សិទ្ធិរី។
នៅក្នុងពិធីកាន់បិណ្ឌទី១ នាយឧត្តមសេនីយ និងលោកស្រី រួមជាមួយនាយទាហាន បានអញ្ជើញរាប់បាត្រ ជាកិច្ចឧទ្ទិសកុសលផលបុណ្យជូនវិញ្ញាណក្ខន្ធ បុព្វការីជន មាតាបិតា ជីដូនជីតា និងញាតិកាទាំង៧សណ្តាន និងឧទ្ទិសកុសលជូនដួងវិញ្ញាណក្ខន្ធ វីរៈកងទ័ព ដែលបានបូជាសាច់ស្រស់ ឈាមស្រស់ នៅក្នុងបុព្វហេតុការពារអធិបតេយ្យបូរណភាពទឹកដី សូមមកទទួលនូវមនុញ្ញផល ផលបុណ្យ និងឆាប់បានទៅសោយសុខនៅក្នុងទីឋានសុគតិភព ។
ក្រៅពីពិធីកាន់បិណ្ឌទី១ នាយឧត្តមសេនីយ៍ សឹង សំណាង និងលោកស្រី បានអញ្ជើញចុះសួរសុខទុក្ខព្រះចៅអធិការវត្តវាលុកថុល្លារាមដែលកំពុងអាពាធ និងសម្រាកព្យាបាលនៅក្នុងវត្តនោះ ព្រមទាំងប្រគេនបច្ច័យមួយចំនួន ដើម្បីជួយឧបត្ថម្ភការថែទាំព្យាបាលដល់ព្រះចៅអធិការដែលកំពុងអាពាធ៕
